Dashuria digjitale: Si lidhjet me chatbot po sfidojnë martesat tradicionale

Në një botë ku inteligjenca artificiale po depërton gjithnjë e më shumë në jetën tonë emocionale, WIRED raporton se partneritetet me AI nuk janë më thjesht lojë. Avokatët e divorcit parashohin se marrëdhëniet me chatbot-e po krijojnë një sferë të re tradhtie – dhe mund të jenë de facto arsye për prishje martese.

Rebecca Palmer, një avokate divorci, thotë se njerëzit me nevoja emocionale të paplotësuara janë më të ndjeshëm ndaj lidhjeve me AI: chatbotët janë të disponueshëm 24/7, ofrojnë mbështetje konstante dhe rrallë “fyejnë” – gjë që i bën tejet tërheqës për disa bashkëshortë.

Në disa raste, këto lidhje virtuale janë shndërruar në probleme ligjore. Disa klientë divorci po deklarojnë se kanë ndarë informacione shumë personale me chatbot-e — përfshirë të dhëna bankare — dhe kanë harxhuar shuma të konsiderueshme teksa zhvillonin marrëdhënie emocionale.

Sistemi ligjor po përballet me sfida të reja: disa shtete po konsiderojnë AI-në si “palë e tretë” në divorc, jo si person, dhe debati për statusin ligjor të këtyre bot-ëve është në lulëzim.

Avokatët paralajmërojnë se në rast divorcesh, përdorimi i AI‑ve mund të ndikojë në çështje si ndarja e pasurisë (nëse ka përdorime të fshehta dhe shpenzime për chat‑bot) ose kujdestarinë e fëmijëve, sidomos në rastet kur prindërit kalojnë kohë të konsiderueshme në biseda me AI.

Megjithatë, jo të gjithë janë kundër. Disa përdorues ndjejnë se lidhjet me AI u japin mbushje emocionale dhe kuptim që ju mungon në marrëdhëniet njerëzore. Palmer paralajmëron: këto marrëdhënie nuk janë pa limite – dhe ligji, shoqëria dhe psikologjia duhet t’i njohin ato.