Firmat e Thesarit Kripto mund të kthehen në “Berkshire Hathaway” të së ardhmes

Firmat e njohura si Digital Asset Treasury (DAT) – kompani që mbajnë dhe menaxhojnë kriptovaluta në bilancet e tyre – mund të evoluojnë nga struktura spekulative në gjigantë të qëndrueshëm të industrisë, të ngjashëm me konglomeratin financiar Berkshire Hathaway, sipas analizës së fundit nga Ryan Watkins i Syncracy Capital.

Sipas tij, këto kompani zotërojnë aktualisht rreth 105 miliardë dollarë në Bitcoin, Ethereum dhe asete të tjera dixhitale. Por fuqia e tyre e vërtetë nuk qëndron vetëm te “HODL”-imi i kriptomonedhave. Watkins thekson se nëse këto kompani arrijnë të përdorin kapitalin e tyre për të investuar në biznese reale, të marrin pjesë në qeverisjen e protokolleve, të ofrojnë shërbime staking apo të blejnë infrastrukturë kritike si serverë validues, atëherë ato mund të shndërrohen në lojtarë afatgjatë dhe vendimtarë të ekosistemit.

“Një DAT e suksesshme duhet të jetë një hibrid: pak si një fond i mbyllur ose REIT me kapital të përhershëm, pak si një bankë që përdor bilancin për të gjeneruar të ardhura, dhe pak si Berkshire Hathaway që bën alokim strategjik kapitali,” – thekson Watkins.

Megjithatë, rruga drejt suksesit nuk është e lehtë. Shumë nga këto kompani të hershme mbështeten ende kryesisht te inxhinieria financiare dhe te çmimi i tregut, pa pasur një bazë të fortë operacionale. Nëse tregu bie ose nëse zhduket primi i tregut ndaj vlerës neto të aktiveve, disa DAT mund të përballen me kriza serioze likuiditeti.

Për të mbijetuar dhe për t’u rritur, analisti thekson se këto kompani duhet të demonstrojnë disiplinë të hekurt në menaxhimin e kapitalit dhe të ndërtojnë aftësi operacionale që i lejojnë të gjenerojnë të ardhura të qëndrueshme, jo vetëm të varen nga rritja e çmimeve të kriptove.

Nëse kjo ndodh, Watkins beson se DAT-të e së ardhmes mund të bëhen jo vetëm institucione financiare të fuqishme, por edhe struktura që ndikojnë në mënyrë të drejtpërdrejtë në zhvillimin e rrjetit blockchain dhe ekonomisë së re dixhitale.